Engelskkurs i London

Eg valte å reisa til London for å studera engelsk ein månad, rett og slett fordi eg følte at engelskkunnskapen min ikkje var god nok. Prosjekttittelen fortel ganske klart kva som var målet med turen: "No skal eg bli betre i engelsk!"

Sjølv om eg jobbar i lokalavis, så hender det at eg intervjuar folk som snakkar engelsk. Somme gonger gjer eg også research på engelske nettsider, eller mottek pressemeldingar på engelsk.

Eg er svært nøgd med opplegget. Eg valte å studera gjennom organisasjonen EF, som har ein eigen skule for studentar som er over 25 år i London. I tillegg til å studera sjølve språket, fekk eg på denne måten høve til å bli kjent med folk frå heile verda via skulen. Her var det studentar frå Brasil, Japan, Kina, Frankrike, Finland, Chile, Sveits, Tyskand, Frankrike m.m.

I klassen hadde me mykje diskusjonar om ulike tema for å praktisera språket vårt, og på denne måten fekk me læra om ulike kulturar i forskjellige land. Det å diskutera straff for barn var ganske spennande, for meiningane var svært ulike sidan folk var oppvaksne med ulike kulturar. Det var også høve til å melda seg på ulike aktivitetar utanom undervisninga. På denne måten var det enkelt å få praktisera språket utanom skuletid, og det var lett å bli kjent med andre. Eksempel på aktivitetar: skriveklubb, filmklubb, jobbsøkarklubb, salsa-kurs, musikalar, pub kvar tysdag ol.

Eg valte å bu hos vertsfamilie, nettopp for å praktisera språket mest mogleg. Hadde eg valt på nytt, så hadde eg truleg valt studentheim. Her får du også snakka mykje engelsk, sidan dei fleste andre ikkje kjem frå Norge. Dei som budde der hadde mykje kortare reiseveg til skulen/sentrum. Det var veldig vanleg å bruka opp til ein time kvar veg til skulen, for dei som budde i vertsfamilie. Det måtte eg, så det gjekk ein del tid vekk til reising. Når et er sagt, så hadde eg god tid til å lesa engelske blader/aviser på toget og undergrunnen, så det var ikkje heilt bortkasta.