Washingtonseminaret 2018

Eg melde meg på Washingtonseminaret for å få betre innsikt i amerikansk politikk i stort og i interessekampane, strategiane og kommunikasjonstrendane som prega politikken midtvegs i det som har vore ein ganske annleis presidentperiode. Seminarprogrammet involverte møte med lobbyistar frå både republikansk og demokratisk side, nære rådgjevarar av Trump-kampanjen og Clinton-kampanjen, tenkjetankar og politiske analytikarar, journalistar som følgjer amerikansk politikk til dagleg og kommunikasjonsfolk som analyserer kommunikasjonstrendar og korleis dei vert brukte for å få politisk påverknad. Programmet gjekk over fem tettpakka dagar - tre dagar i Washington og to i Charlottesville i Virginia, byen som var slagmark for Unite the Right-demonstrasjonen i 2017. I tillegg hadde vi ein reisedag mellom dei to, der vi òg vitja Christ Church i Alexandria og eigedomen til Thomas Jefferson utanfor Charlottesville.

Eg jobbar som journalist og skriv om politikk og samfunn, utanriks- og tryggingspolitikk inkludert. Å få betre innsikt i kva som skjer i USA og kvifor det skjer, er såleis nyttig både for å kunne dekkje amerikansk politikk meir framover, men òg for å forstå dynamikken i den internasjonale politikken og det transatlantiske forholdet betre. Den internasjonale ordenen som vart etablert i etterkrigstida er i endring, og uro over utanriks- og tryggingspolitikken til Trump er ein av faktorane bak. Seminaret introduserte meg òg for interessante organisasjonar, miljø og kjelder, som eg kan kome til å kontakte for intervju eller bakgrunnsinformasjon seinare.

Eg synest seminaret var både spanande og variert. Dei fleste lobbyistane, politikarane, akademikarane, journalistane og analytikarane vi møtte var interessante å høyre på og bidrog til at eg sat att med ei betre forståing av interessekonfliktar i og mellom dei politiske partia og i samfunnet generelt. Særleg interessant synest eg det var å høyre på Tim Phillips frå konservative Americans for Prosperity, og Ann Stone, som var ein av leiarane i kampanjen Women Vote Trump i 2016. Det som kunne vore meir spanande, var rammene for mange av møta vi hadde. Litt for mange av møta med aktørar i Washington gjekk føre seg på eitt og same konferanserom på hotellet. Det er nok både billegare og enklare å få til logistisk enn å frakte ei gruppe på nesten 40 stykk rundt mellom ulike stader i byen, men det er alltid meir gjevande å møte folk i meir naturlege settingar enn i eit konferanserom.

Eg hadde for eigen del fått endå meir ut av seminaret om eg hadde følgt amerikansk politikk tettare på førehand, og kanskje òg planlagt å produsere journalistisk stoff undervegs. Men seminaret gav uansett stort utbyte.