"Kulturelle endringar i Noreg og Europa"

Som det framgår av den oppdaterte søknaden, vart det behov for endringar på opplegget for permisjonen. Årsaka var avlysing av eit planlagt fag ved Høgskulen i Volda. I staden har eg teke to mastermodular i programmet Theology and Ministry ved NLA Høgskolen i Bergen. 1) TAM303: Spirituality and spiritual formation og 2) TAM 304: Missional Ecclesionloogy in light of Trinitarian Faith and Comtemporary Culture.

Modulane byggjer vidare på teologisk kompetanse eg har frå før, og som vil vere til nytte i redaksjonen. Begge modulane handlar om teologi og trusliv i møte med samtidskulturen og globale spørsmål. Det er relevant for mykje av det eg har journalistisk ansvar for å Dagen. Kulturen er prega av auka pluralisering og sekularisering. Korleis påverkar dette samtalen om livssyn og særleg kyrkje- og kristenliv? Eg opplevde at akademisk arbeid med desse problemstillingane gav både innsikt og inspirasjon til tema som er høgst relevante for stoffområda eg har ansvar for i Dagen.

Ein fordel ved dette prosjektet var at det var relativt stor vekt på skriftleg arbeid med stoffet. I kvar av modulane var det åtte såkalla arbeidskrav som var obligatoriske. Dessutan var eksamen i det eine ei semesteroppgåve på 5000 ord, i det andre ein heimeeksamen med same lengde. Det gjorde at eg fekk godt høve til ikkje berre å lese, men reflektere skriftleg over sentrale spørsmål. Desse var i høg grad kopla til samfunns- og kultursituasjonen og dermed nyttige også frå eit journalistisk perspektiv. Ein annan fordel var at det var god tilgang til lærarar og miljø fordi det var få studentar i gruppa. På ei side sett kunne det vere ein fordel med eit større studiemiljø, der det var mogleg å knytte fleire nye kontaktar og få endå fleire perspektiv, men det var samstundes mogleg å bli kjend med studentar på andre liknande kurs. Eg trivst sjølv med å jobbe mykje sjølvstendig, men for studentar som trivst betre med å jobbe saman med andre, kan det nok vere ein fordel å velje prosjekt eller kurs med større grad av samarbeid.

Eg trur generelt ein knapt kan overvurdere verdien av å skrive som student. Sjølv om ein tek eit fag der det er mindre krav om skriving, meiner eg det vil auke utbyttet vesentleg om ein prioriterer å gjere dette. For ein som tek studiepermisjon frå ei stilling som journalist, trur eg også det er viktig å tenkje gjennom kva ein vil ha ut av ein studiepermisjon, og korleis ein kan nå måla sine. Til dømes tenkjer eg at det å vere i eit miljø, og få gode samtalar med både akademikarar og studentar utan at det er i ein intervjusetting, er av svært stor verdi.